Ye ek baat samajhne mein raat ho gai hai
ye ek baat samajhne mein raat ho gai hai
main us se jeet gaya hoon ki maat ho gai hai
main ab ke saal parindon ka din manaaunga
meri qareeb ke jungle se baat ho gai hai
bichhad ke tujh se na khush rah sakunga socha tha
tiri judaai hi vajh-e-nashaat ho gai hai
badan mein ek taraf din julu' main ne kiya
badan ke doosre hisse mein raat ho gai hai
main junglon ki taraf chal pada hoon chhod ke ghar
ye kya ki ghar ki udaasi bhi saath ho gai hai
rahega yaad madine se waapsi ka safar
main nazm likhne laga tha ki naat ho gai hai
