Tumhare Khat Mein Naya Ik Salam Kis Ka Tha

 Tumhare Khat Mein Naya Ik Salam Kis Ka Tha

تمہارے خط میں نیا اک سلام کس کا تھا

نہ تھا رقیب تو آخر وہ نام کس کا تھا

وہ قتل کر کے مجھے ہر کسی سے پوچھتے ہیں

یہ کام کس نے کیا ہے یہ کام کس کا تھا

وفا کریں گے نباہیں گے بات مانیں گے

تمہیں بھی یاد ہے کچھ یہ کلام کس کا تھا

رہا نہ دل میں وہ بے درد اور درد رہا

مقیم کون ہوا ہے مقام کس کا تھا

نہ پوچھ گچھ تھی کسی کی وہاں نہ آؤ بھگت

تمہاری بزم میں کل اہتمام کس کا تھا

تمام بزم جسے سن کے رہ گئی مشتاق

کہو وہ تذکرۂ ناتمام کس کا تھا

ہمارے خط کے تو پرزے کئے پڑھا بھی نہیں

سنا جو تو نے بہ دل وہ پیام کس کا تھا

اٹھائی کیوں نہ قیامت عدو کے کوچے میں

لحاظ آپ کو وقت خرام کس کا تھا

گزر گیا وہ زمانہ کہوں تو کس سے کہوں

خیال دل کو مرے صبح و شام کس کا تھا

ہمیں تو حضرت واعظ کی ضد نے پلوائی

یہاں ارادۂ شرب مدام کس کا تھا

اگرچہ دیکھنے والے ترے ہزاروں تھے

تباہ حال بہت زیر بام کس کا تھا

وہ کون تھا کہ تمہیں جس نے بے وفا جانا

خیال خام یہ سودائے خام کس کا تھا

انہیں صفات سے ہوتا ہے آدمی مشہور

جو لطف عام وہ کرتے یہ نام کس کا تھا

ہر اک سے کہتے ہیں کیا داغؔ بے وفا نکلا

یہ پوچھے ان سے کوئی وہ غلام کس کا تھا

Tumhare Khat Mein Naya Ik Salam Kis Ka Tha?

Na Tha Raqeeb To Aakhir Wo Naam Kis Ka Tha?

Wo Qatal Kar Ke Mujhe Har Kisi Se Poochte Hain

Ye Kaam Kis Ka Hai? Ye Kaam Kis Ka Tha?

Wafa Karein Ge, Nibhaen Ge, Baat Maanain Ge

Tumhein Bhi Yaad Hai Kuch, Ye Kalaam Kia Ka Tha?

Raha Na Dil Mein Wo Be_Dard Aur Dard Raha

Muqeem Kon Hua Hai, Maqaam Kis Ka Tha?

Na Pooch Gach Thi Kisi Ki Wahan Na Aao Bhagat

Tumhari Bazm Mein Kal Ehtamam Kis Ka Tha?

Tamam Bazam Jisy Sun Ke Reh Gai Mushtaaq

Kaho Wo Tazkara-E-Naa Tamam Kis Ka Tha?

Guzar Gaya Wo Zamana, Kahoon To Kis Se Kahoon?

Khayal Dil Ko Mere Subh-O-Shaam Kis Ka Tha?